Ший ши шу далар дездир «Даьхен лорбой» яхача моттигерча ганзо
Болх дӀаболабаь ши шу дизар дездеш хилар, «Даьхен лорбой» яхача мехкарча ганзе. Цу кхетаче гулбеннабар тӀема операцен ветеранаш, вахар хаьдача бӀухой гаргара нах. Из хоам «Сердалога» бир цу моттигера.
Ганза кулгалхочун гӀонча йолча Новрбенаькъан Фаринас дийцар укх шин шера дӀабихьача балхах, дӀахойодача хана а боаггӀача боараме тӀалатта декхараш кхоачашдеш шоаш дӀабахьа лаьрхӀа хиларах. Иштта кхетаче бийхача паччахьалкхен филармонерча артисташа Барханой Заьлмахас «ГӀалгӀай», Акхасаганаькъан Мовсара «Эггара хозагӀъяр», Пхьугой Амира «Ха», Долакханаькъан Зульфияс «Нана-лаьтта», Гарданаькъан Шамала «Вай укх лаьтта массахана дахаргдац» КӀанташанаькъан Джабраила « Майра кӀантий» яха иллеш дӀааьлар хьаьшашта.
«Тахан «Даьхен лорбой» яхача ганза лоархӀаме ди да. Ши шу хьалха вай мехкарча массайолча моттигашка хьайийллар филиалаш. БӀухой, тӀема ветераний, цар цӀагӀарча наьха гӀулакхашка хьожаш къахьег оаха тахан. Доккха баркал кхайкаду оаха вай мехкадаьна Келаматанаькъан Махьмуд-Ӏаьланна, Ӏаьдала болхлошта, массахана бувзам лоаттабеш, гӀо деш хиларах. Аьттув, беркат долаш хилба вай массане болх. Тахан новкъостал эшаш барашта боаггӀача боараме из лоаттаде, цар хьашташ кхоачашде аьттув, низ хилба вай», - белгалдир Новрбенаькъан Фаринас. ТӀема аренашка вахар хаьдача бӀухой дезалашкарча наха доккха баркал аьлар ганза болхлошта, шоашка хьожаш хиларах.
«ЧӀоагӀа лакха терко еш дӀахьу цу наха шоай болх. Тха цӀенна гӀо даьд цар, тахан а тха хьашташ кхоачашдара терко еш ба. Са виӀий цӀен-нана, пхи бер дисад, царех хӀаране гӀулакхага хьожаш, болх лоаттабу цар, чӀоагӀа дега тоам бу цу гӀулакхо», - дийцар тӀема аренашка вахар хаьдача росгвардейца Хамхой Хьасана нана йолча Лидас.
