Хи чу ваха бархӏ шу даьнна кӏаьнк лохаш ба мехка ден-бус
Шолж яхача хи чу ваха бархӏ шу даьнна кӏаьнк лохаш ба вай мехка, ди-бийса ца къовсаш. Из хоам «Сердалога» бир МЧС болхлоша.
«Кӏирандийнахьа ийс сахьатагара ийс сахьат даллалца 24 км кхоачаш долча Шолжа ийс моттиге къахьегаш хиннаб кӏаьнк лаха арабаьннараш. Цу оарцанна юкъе 849 саг ва, царех 713 саг – гӏо деш бараш. РСЧСагара – 136 саг, 18 машин, Россе МЧСагара – 92 саг, 8 машин. Хи чу, иштта хин гонахьарча моттигашка хьожаш къахьийгад цига.
Нохчий мехкарча МЧС болхлошца Эбарга-Юртарча геттара хала лоархӏаш долча доазонашка гӏолла хьожаш болх чакхбаьккхаб. Гӏо дераш хин гонахьарча моттигашка гӏолла чакхбаьннаб кинологашца», - йоах тхога бенача хоамо.
Нохчашкахьарча Серноводске ӏочукхаччалца Шолжа чура хӏамаш дӏа-хьа йоахаш, хьожаш чакхбаьннаб нах. Ийс сахьат даьлча, сов баьде хиларах, соцабаьб болх.
