«Керттера дакъа дIадолалуш, хьаьший чакхбаьлар, ГетагӀазанаькъан Илеза кийчбаьча гойтамга хьожаш, из ший тайпара, теркам дикка тIаозаш йола моттиг яр.

Кхетачен корта бар «Ма лелаелахь, доттагIа, вIалла а наркотик» яха дешаш.

Дешархошца къамаьл деш, «ТIехьале» яхача меттаоттаяра йолча центра кулгалхочо Орцханаькъан Рашида, говзанчаша Жандиганаькъан Тимура, Келиганаькъан Мурада жоп делар вай республике наркоманеца хьал мишта латт яхача хаттарашта. Цар иштта белагалдир, ГIалгIай мехка наркоманеца къовсам лоаттабара, дешара моттигаша дакъа а лоацаш, наркоманецара хьал даржаргдоацаш бола болх дIахьош хилар.

Цу тайпара цига дакъа лоацаш бар театра, кинон центре деша багIараш а, бераша цу гойтаме хьокха оттадир шоаш даьхка сурташ», - йоах хоамо.

ЦIечой Жанатте цига дIалекхача «Дагабоха вайна уж…» яхача ашаро дукха уйлаш чуйоссийтар, наркотикех хьокхавенна шоай гаргара саг кIалхарваккхара уж тIахьехаш. Цу зулама чулоацам гойтар шоай иллешца Дзортанаькъан Гирихана, Эккажанаькъан Розас.

Иштта дика дакъа лаьцар кхыча артисташа. Iарпенаькъан Хьавас чIондарг лекхар, Оздой Лейлас гобой.

«Тхо хьожаш да царна новкъостал хургдола никъ лаха, бакъда цхьайолча хана уж тхол хьалхабоал, наркотикаш йоаржаеш. Кагирхой хIара тоабанна хьалхадаккха безам бар са, кхоана шу да дахача моттига, берригача мехка даьй хила дезараш. Кагирхой, Iехалуш, юкъеух цу зулама, бакъда вай да духьалъовтта дезараш», - аьлар Центра кулгалхочо Дзортанаькъан Мадинас.