ГӀалгӀайче кагирхой тӀема-патриотически гуллам хьакхайкабаьб
ГӀалгӀайчен кагирхой дакъа лоацаш ба «Авангард» яхача кагирхой тӀема-патриотически кийчон гулламе, из дӀахьу «Мужече» яхача спортивни фусаме. Хургболча Даьхе лораерашта укхаза кердадараш Ӏомадергда, из царна накъадаргда Российски эскара мугӀарашка амал деш, яхаш, дийцар «Сердало» газетага ГӀалгӀайчен кагирхой гӀулакхех йолча комитето.
«Гуллам дӀахьош кагирхошта хьаэца дукха хӀама да, тӀема кийчо еш, Ӏомабеш йола моттигаш хиларах; таро лу, бокъонца болча тӀем тӀа санна, ший тӀема гӀулакх лораде. Кагирхой мугӀарашка нийса оттар, тӀема машинаш лелаяр, тайп-тайпара герз Ӏомадар - из деррига лоархӀаме да Герзашцарча низий мугӀарашка амал дара», - аьлар тхоца къамаьл даьчо.
Проекта керттера маӀан - доакъашхой Ӏомабарал совгӀа, Даьхенцара безам совбаккхар, иштта бехктокхаме хила, шоай Даьхе еза Ӏомабар.
