Цхьаькха цхьа саг Ӏехаваьв зуламхоша, хӀилланца 13 эзар сом даьккха
ГӀалгӀай мехка, гуш боацача доазон тӀарча зуламхоша Ӏехаяь, ше хала даьккха 13 эзар сом дӀадахьийтар вай мехка яхархочо, яхаш, дувц «Сердало» газетага республикерча МВД.
«Кхалсаг полице ера, малав ца ховча сага телефонаца дийцача къамаьлах Ӏехаенна, цун чота тӀа 13 эзар сом дӀадахьийтад аз, аьнна. Бокъонаш лораераша хӀанз из гӀулакх тохкаш да», - яхаш, хоам бу тхога.
ГӀалгӀай Республике гӀолла йолча МВД болхлоша кхайкарал ду бахархошка, малаш ба ца ховча нахах ма теша, цӀаккха а царна ахча дӀа ма кхахьийта. ХӀаьта а, хоамашка ладийгӀача, из мо дола гӀулакх хӀара денна нийслуш да.
Дукха нах тешаш хул атта хьадеш долча хӀамах, моллагӀа дола хаттар сиха кхоачашдеш хиларах, иштта кхыйолча вахара моттигех. Зуламхоша цох шоашта пайда бу, наха цох зе хуле а.
