Белгалбир 2024 шера бе лерхӀаш бола юкъарча юрисдикцен судий болх
ГӀалгӀайчен Кулгалхочо Келаматанаькъан Махьмуд-Ӏаьлас дакъа лаьцар, ГӀалгӀай Республикан юкъарча юрисдикце федеральни а мировой судий судахоша дӀахьош хиннача йоккхача кхетаче, цига дийца дош дар 2023 шера баьча балха жамӀа дар, иштта 2024 шера де лерхӀар белгалдаккхар, яхаш, дийцар «Сердало» газетага мехка кулгалхочо.
«ЧӀоагӀа лоархӀаме да цу тайпара кхетаче дӀаяхьар суда болх бувцача даькъ тӀа, цунца бехктокхаме хила а веза, цул совгӀа, кхы кӀезигагӀа доацаш, лоархӀаме да хьадеш дар къаьга хилар, гуш хилар.
2023 шера ГӀалгӀай Республикан юкъарча юрисдикце кхаьчар 65 эзар судебни гӀулакхаш а материалаш а. Дика а шоай ханнахьа а 63 эзар совгӀа хаттар техкар», - аьлар Махьмуд-Ӏаьлас, ше цу балхах дувцаш.
Цо белгалдир, судо нийса кхел яь хиларах, таро хилар бокъонах доацаш дӀадахийта Ӏаьдала ахча нийса дӀа-юха хьожаде, бакъдар цига хьалхадаккха, юкъера къовсаме хаттараш кхоачашде.
Мехкадас яхачох, судахой гӀулакх техкадар аьнна боалаш бац, цу тӀа соцаш бац цар болх. Цар хьакъоастаду нийсадар-доацар, саг бокъонна тӀехьавоаккх, нийсхо хиларах бола тешам лу наха.
Цо белгалдир, юкъарча судий судахочунна болх лоархӀаме хилар, из бувзабенна ба наьха сатувсарца. Тахан российски паччахьалкхе халача ханашта духьаллатташ я, паччахьалкхен хьашташ кхоачашдара, из лораяра, цун кхерамзленна Ӏалашо яра болх дӀахьош дукха нийслу цунца дувзаденна хаттараш.
«Республикан а иштта Российски Федерацен а вахархочун бокъонаш дика лораеш хила еза - из вай юкъара декхар да, хьалхарча аргӀагӀа кхоачашде дезаш а да», - аьлар Келаматанаькъан Махьмуд-Ӏаьлас.
