ГӀалгӀайче хьайийллар ши радиостанци
ГӏалгӀайчен карара шу хоздир таьрахьашца дегӀадара Академе «Шансон», «Дача» яха ши радиостанци хьаелларо, яхаш, дийцар «Сердало» газетага цу моттигера.
СМИ викалаш баха хилар цига, хьажа таро хилар гӀишлонга, цхьацца хаттараш делар.
«Шансон» радио керттерча редактора Ахметшин Рустема яхачох, уж Россе интернет-хоамаш чулоацаш хилара хьалхарчарех ба, цар доккхал ду ГӏалгӀай мехка цу тайпара балха моттиг дӀайолае таро хиларах.
Укхаза гӀолла хозаш хургья берригача мехкахоша дӀалокха ашараш. Цул совгӀа, моттигерча бахархошта хозагӀа хетача оагӀорахьа дӀаяхьа лерхӀ программа. Из хургья Магасе гӀолла, 96.5 FМ.
«Цул кӀезигӀа лерхӀам болаш дац «Дача» яха радио болх бе йолаенна хилар а. Хӏанз дукхача наха доккхал де йиш йолаш да, дикагӀа йолча пхеннена юкъейодаш йола «Дача» радиостанци вайцига хилар. Цига гӀолла хозаргда 70-90-ча, 2000-ча шерашкара дикагӀа дола иллеш, уж декаргда 92.2 FM радиоталгӀен тӀа», - аьлар «Крутой медиа» радиохолдинга керттерча продюсера Синицина Дианас.
