«Поэт, журналист, хьехархо Ӏарчакханаькъан Сали ваьв 1958 шера. Цун хьалхара книжка арадаьннад 1979 шера, поэзи езараша чӀоагӀа дезаш тӀа а ийцар из. Ӏарчакханаькъан Сали дукхача моттигашка кепа етташ хиларах тарра, наха везавелар, цунга хьежжа толамаш а доахар»,-аьлар «Сердало» газетага литературан сахьат вӀашагӀделлараша. Ӏарчакханаькъан Салех СССР а Россе а журналистий Союза доакъашхо хилар, иштта йоазанхой шин Союза доакъашхо а хилар цох. Из дакъа лоацаш хиннав Москве дӀахьош хиннача СССР къонача йоазанхой ХӀХ совещане. Цун йоазошта кепа йийттай тайп-тайпарча ханашка «Дон», «Аврора», «Наш свременник», иштта «Литературни ГӀалгӀайче», «СелаӀад» яхача журналаш тӀа. Хьехархочун балха 25 шу дӀаденнад цо. ГӀалгӀай меттах дика кхеташ вола Ӏарчакханаькъан Сали тайп-тайпарча шерашка Нохч-ГӀалгӀайчен книжни издательстве корректор а редактор а хиннав, иштта «Сердало» газете воккхагӀвола корреспондент волаш къахьийгад цо. Цо тоадаьд ГӀалгӀайчен ишколашка хьехаш дола книжкаш. Цун говзал, цун ховш дар тахан а накъадоалаш да къаман журналистике. 1981 шера денз, газетацара бувзам хоада ца беш, хьавенав из. ХӀанз укх сахьате, Яхььяй Сали къахьегаш ва «Сердало» газета керттерча редактора заместитель а, къонача журналистий хьехамча а волаш.