ТӀехьа дувш дола йивар дӀадувш ба ахархой
ГӀалгӀайче дӀаболабаьб тӀехьа дувш дола ялаташ дӀадера болх. ГӀалгӀай Республикан Кулгалхочун, Паччахьалкхен зарбан болх лелабераша яхачох, юртбоахама балхаш лаьрххӀача ханашка дӀахьош да. Мехка ахархошта эшача техникаца 90% Ӏалашо яьй, иштта фу а дӀатоха молхаш а йолаш я.
Карарча шера дӀае лаьрхӀад 41,1 эзар гектара тӀа 2025 шерара ка бола культураш. ХӀанз 31,6 эзар гектар ялат дӀадийна даьннад, царна юкъе я 12,1 эзар гектар хьажкӀаш, 5,3 эзар гектар кен, 0,9 эзар гектар гидуаргаш, иштта 5,8 эзар гектар доакъара культураш.
ГӀалгӀайчен кулгалхочо Келаматанаькъан Махьмуд-Ӏаьлас, ялат дӀаде болабаларах дувцаш, белгалдир, таханарча денна юртбоахама балхаш, мохк экономически дегӀабоалабара лоархӀамечарех хилар.
«Фермераша шоай болх дика вӀашагӀбелла хиларах, вай таро хул хӀара шера чуэцаш бола хьувкъам лакхагӀа хилийта», - аьлар цо.
Белгалду, юртбоахама Министерствос яхачох, карарча шера дӀахьош бола юртбоахама болх дика толам болаш хургба.
