Хий хьалу гӏишло хьалъеш я Эса тӏа
Гӏалгӏайчен Шолжа кхален Оалкама дӏахьош ба Эса тӏа хий хьалуш йола гӏишло хьалъяра болх, цун низ ба 100 эзар кубометр хий ден-бус лоаттадергдолаш. Из Гӏалгӏайчен лоархӏамеча моттигех цаӏ я, кхыча проекташта юкъе. Из лаьрхӏа я дукхача хана денз латташ дола хаттар кхоачашде - мехка бахархой хица ӏалашбе.
«Из йоккха, гидротехнически комплекс хий чулоацаш а дӏалуш а я. Цудухьа керттера терко лоаттаю хьабеча балха дикала, технологеш лораяра, деррига гӏишлон балхаш кхоачашдара. Балхаш дӏахьош да юха ца совцаш, шоай аргӏагӏа. Балха дикала даим тӏахьожам лоаттабу, цига яхе хул цу хаттарах бехктокхаме йола тоаба. Белгалдаккха лов, Россе Президента, Паччахьалкхено таро лу вайна цу тайпара доккхий дешаш кхоачашде. Вай декхар да - гӏишло хьалъяр, хин кхоачам лоаттабар, из Гӏалгӏайче дегӏайоалаеш накъабаргба итташ шерашка», - аьлар ший телеграм-оагӏон тӏа Келаматанаькъан Махьмуд-Ӏаьлас.
Проект кхоачашъяр лаьрхӏа да массехк даькъа. Керда таронаш хьакхолларах карагӏдаргда республикан кхаленашка, йоккхийча шахьарашка цӏена хий лоаттаде, цу юкъе я Шолже, Илдарха-Гӏала, Магӏалбик-Шахьар, иштта лоаман лакхача моттиге яда юрташ.
Гӏишлон даькъ тӏа йоаржаяьй чӏоагӏа технически, лабораторни тӏахьожама оагӏув, цо таро лу гидротехнически гӏирсаш тешшаме леладе, санитарни боарамах хий хилийта. Комплекс болх бе дӏайолайича таро хургья чӏоагӏа кӏийле е, бахархой вахара хьалаш тоадара, дӏахо Гӏалгӏай мохк вахара-экономически дегӏакхувлара.
