Асфальта тӀа наркотикашта духьалара сурташ даьхкар
«Къона патриот» яхача ахкан замагӀа салоӀача, могашал тоаяра лаьрхӀача лагере, МагӀалбик- Шахьара Ӏаьдало дакъа а лоацаш, «Наркотикашка «ак» ала!» яха суртий яхь дӀайихьар, яхаш, дийцар «Сердало» газетага шахьара даькъ тӀарча администраце зарбан болх лелабераша.
«Яхьа доакъашхоша шоаш наркотикашта духьала хилар гойташ дола сурташ дагадохийтар. Кхелахоша, цу балха мах оттабеш, котваьннар белгалвир. Из яхь лоархӀаме яр наркоманеца къовсам лоаттабара, кагирхошта дика масал а гойташ из дӀахьош хиларах», - аьлар тхоца къамаьл даьчо.
Шоай сурташка гӀолла, бераша гойтар наркотикаш лелаяр сага могашал йоаеш долга, цох хьадоала зулам доккха хилар. Къонача суртанчий балхаша хьагойт воча хӀаманна духьалъотта везаш хилар, цар тӀахьех нийса вахара никъ лелабара.
