«Дегаца хоз, сица гу» яха кхетаче дӀайихьар вай мехка
«Дегаца хоз, сица гу» яха кхетаче дӀайихьар вай республике. Цу гӀулакха хьалха эттар яр республикерча бӀаргса эшаденнача наьха Ерригроссийски оагӀон болхло хинна Колой Айша.
«ВӀашагӀкхетаре гулбеннабар бӀаргса эшаденнача, хӀама хозаш боацача наьха гӀулакхех бола кулгалхой, доакъашхой. Хафизаша КорӀа тӀара сураташ дешаш, бераша дин довзийташ йолча викторине дакъа лоацаш, дӀайолайир из беркате кхетаче. Нийса жоп деннарашта дала кийчдаь мерза совгӀаташ дар. Геттара раьза болаш, дог гӀоздаьнна бар зӀамига хьаьший», - дийцар «Сердалога» из гӀулакх дӀахьош хиннараша.
Белгалдечох, из кхетаче дӀаяхьа гӀо де айттараш дукха бар. «Дукха карагӀдоала Росси» яхача юкъарча моттиго совгӀаташ ийцар, банкет елга дӀатӀаийцар «Тешам» яхача гӀо деш йолча ганзо, «Брауни» яхача мерза даараш кийчдеча моттиго, мах боацаш, 200 сага кхача кийчбир, къахетаме болча наьха Клуба доакъашхоша из деррига дӀахьош новкъостал дир.