Хьаьший дукха безаш болча вай мехка кхаьчар Нохчий мехкара, АьдагӀера, селий а черсий а мехкашкара, хӀирашкахьара тоабаш. Республикера кхоллама тоабаш яр уж тӀаэцаш.

«ХӀара мехка культура гойташ, болх дӀабихьар кхетаче. Къамий иллеш доахаш, халхараш деш дӀайихьар ха. Цул совгӀа, Наьсарерча культуран цӀен хьалхашка хилар тайп-тайпара хӀамаш йохкаш йола ярмарка-гойтам. МоллагӀа волча сага, дӀатӀаваха, ший кулгашца цхьа хӀама хьакхолла, говзал гойта йиш яр цига, цул совгӀа, эца шортта хоза хӀамаш яр», - дийцар «Сердало» газетага культуран гӀулакхех йолча министерствон болхлоша.

Лакхача боараме, гулбеннараш чӀоагӀа раьза болаш, чакхъяьлар из моттиг. Доккха концерт дар бахархошта оттадаь. Доакъашхошта юкъе толашагӀбарашта совгӀаташ луш, чакхбаьлар из болх.

Культуран оагӀонцарча моттиго вӀашагӀтехар тайп-тайпарча къамех бола нах. ГӀалгӀай мехка юхабахка чам болаш, деррига дезаденна, чӀоагӀа раьза хинна цӀабахар хьаьший.