«Юкъарча советацара салоӀа ха» яха болам дӀабихьар мехка
«Юкъарча советацара салоӀа ха» яхача ерригача Россе боламе дакъа лоацаш хилар «Къона патриот» яхача МагӀалбикерча лагере салоӀаш дола бераш. МВД къона а къаьна а болхлой хилар уж болча хьоашалгӀа баьхка.
«Наькъашкара кхерамзле лораеча къахьегамхоша берашта дийцар, шоай балхацарча гӀулакхех.ЧӀоагӀа тамашийна хеташ, ладийгӀар бераша, зулам хиннача моттиге из мишта хиннад гучадоаккхараш мишта гулду дувцача экспертни-криминалистически оагӀон болхлочунга. Кинологаша дийцар шоай балха гӀо деш леладеча жӀалех, цецдаьннадар бераш, моллагӀа дӀалочкъаяь хӀама цар мишта хьалох дувцаш. Иштта берашта гойтар спецназа болхлоша зуламхо мишта хьалоац», - дийцар «Сердалога» из болам дӀабихьараша.
Тайп-тайпарча тамашийна хийттача хӀамаех дизза хилар йиӀигашта, кӀаьнкашта из ди. ВӀалла а шоашта цадайзараш дайза, тамаш еш дар бераш. Геттара чӀоагӀа безабелар царна маьрша вахар лорадара тӀехьа къахьега МВД болхлой. Белгалде деза, МВД болхлоша вай кагирхошца тайп-тайпарча зуламех уж лорабеш, кхетам сомабоаккхаш болх дӀакхухьилга.
