«Берза цӀога низ» яха спектакль мишта оттаяьй хьежар
Наьсарен шахьара культуран ЦӏагӀа, ГӏалгӀай паччахьалкхен драматически театро «Берза цӀога низ» яха спектакль мишта оттаяьй хьожаш бола болх дӀабихьар. Из хоам «Сердало» газетага бир цу моттигера.
«Драмтеатра актёраша, режиссёра Ӏахилганаькъан Фатимас кулгал а деш, шоаш вӀашагӀбелла болх гойтар. Цу балха раьза хилар министерствон викалаш, исбахьален кхел, искусство езараш», - аьлар театра кулгалхочо Албохчанаькъан Муслима.
ГӏалгӀай Республикан культуран министра гӀончас Куртой Маккас, культуран министра Лаьнанаькъан Залинай цӀерах баркал аьлар кхоллама тоабанна, цо культуран даькъ тӀа дика къахьегаш хиларах.
«Сона чӀоагӀа хоза хийтар белам. Укхаза го йиш яр бала а, цӀаьрматал а, иштта нах кегабеш дола ахча а. Театра актёрий дика вӀаштӀехьа даьлар наха довзаш долчча тайпара бакъдар гойта. Со цецъяьлар», - яхаш, шийна цох хийттар дийцар исторически Ӏилмай доктора Дзараханаькъан Зейнапа.
