ГӏалгӀай мехка дӀахьош я, СТД карагӏдаьннарий-хоржамий кхетаче
Наьсарен-Шахьаре дӀайихьар хьалхара ГӏалгӀай Республикан театра болхлой Союза карагӏдаьннарий-хоржамий кхетаче, яхаш, дийцар «Сердало» газетага цу моттиге.
Цу лоархӀамеча кхетачене бар ГӏалгӀай Республикан Кулгалхочун, Паччахьалкхен администраце чурча политикан болх лелабераш Ӏалбаканаькъан Тамара, Буражанаькъан Адам, культуран Министерствон болхлой Боканаькъан Хади, иштта Тиймарзанаькъан Мадина, культуран болхлой, журналисташ.
Дувца оттадаь дош дар театра болхлой Союза гӀалгӀай отделене кулгалхо, ГӏалгӀай Республикан СТД тӀахьожама-ревизен кулгалхо, доакъашхой, отделене правлени, иштта РФ СТД 10-ча аргӀанарча съезда викалаш харжар.
ГӏалгӀай Республикан СТД кулгалхочун моттиге харжа пхи саг оттавир: ГӏалгӀай драматически театр - Дибаранаькъан Макка, ГӏалгӀай кагирхой театр - Хазанаькъан Ваха, эрсий музыкально-драматически театр - Боазаркъанаькъан Микаил, берий театр - Ховтанаькъан Дугурхан, Халкъа кхоллама Цӏа - Гайсананаькъан Султан.
Конференце чаккхе еш, вӀашагӀйолларгья керда тоаба, цун декхар - республикан театра искусство гаргарча пхе шера дегӀайоалаяр.
«Тӏехьарча шерашка тхо доаккхал деш да кхоллама командировкашка, говзанча хьехамашка, лабораторешка, резиденцешка дакъа лаца аьттув хиларах, иштта паччахьалкхен стипендеш луш хиларах.
Хьалхарча хоржамашка кхоачаш, дезде лаьрхӀад РФ театра болхлой Союза 150 шу дузаш хилар. Тха цхьа юкъара план я, цига гӀалгӀай отделене дика а хеташ дакъа лоацаргда.
2026 шера ГӏалгӀайчен даькъ тӀа хургья Къилбаседа Кавказа театрай кхетаче, цига дакъа лоацаргда 13 моттиго. Иштта тхона массанена лоархӀаме да, Украине тӀема операци дӀахьош болча бӀухошта хетаяь проект хилар», - аьлар ГӏалгӀай Республикан СТД кулгалхочун гӀончас Ховтанаькъан Дугурхана.
