«Къона оарцхо» яха проект я мехка йоаржаеш
«Къона оарцхо» яха проект я вай мехка дӏахьош а Миннаца хьаллоацаш а. Из хоам «Сердалога» бир кагирхой цхьанкхетарий Цӏен болхлоша.
«Пхьилекъонгий-Юртарча № 3 йолча ишколе шоаш ӏомадаьр балхаца чӏоагӏдеш хилар бераш. Хьехамчаша хьалхадоаккхаш, лозаваьча сага лораш тӏакхачале де дезаш дола эггара хьалхара гӏо мишта хила деза ӏомадир цар. Моллагӏа хатар хиннача моттиге веха, корзагӏваьнна, кегавенна ца а кхесташ, гӏо эшарашта лерттӏа, боаггӏача боараме новкъостал де дезилга хьалхадаьккхар царна», - дийцар тха газетага. Хьалхара гӏо дарал совгӏа, саг хатар эттача моттигера кӏалхарваккха а ӏомаделар бераш.
«Из тайпара болх берашца дӏакхахьар чӏоагӏа лоархӏаме да. Хӏара дийнахьа майрагӏа, дикагӏа хьагойт цар шоай цу гӏулакхацара говзал, кхетам. Тоабанца болх бе ӏомабалар кхоана царна накъадаргдолаш хӏама да», - дийцар Ерригача Россе студенчески оагӏон доакъашхо волча Тоачанаькъан Беслана.
