Россе Турпала да-нана шоай виӏий цӏи лелаеча ишколе кхадж тоссаш хилар
Россе Турпала Боканаькъан Мустафай цӏихеза хьехархой бола да Къурейш, нана Марем тахан Соагӏапчарча хоржама доазон тӏа кхадж тоссаш бар. 50 шера цар болх баьча ишколе деша ваьгӏав воӏ Мустафа, хӏаьта тахан цун цӏи лелаеш я из ишкол.
«Тӏема операцена юкъе майрал, денал гойтача Боканаькъан Мустафайна РФ Президента Путин Владимира амарца Россе Турпал яха цӏи елар. Эпсара никъ хержа, Даьхен декхараш кхоачашдеш вар яхь йола къаман воӏ. Тахан из деша ваьгӏача, цун дас, нанас дукхача шерашка къахьийгача ишколе, цун цӏи лораеш, сий деш ба. Хӏаьта Къурейша, Марема къаьстта боча я из ишкол – дукха шераш ӏодаьхкад цу чу, дешара никъ цигара дӏаболабаьб цар хьамсарча воӏа», - аьлар вай мехкадас Келаматанаькъан Махьмуд-Ӏаьлас.
Даьхен хӏама лорадар, гӏо эшача моттиге эггара хьалхарчарца ураоттар дийца варгвоацаш доккха да. Россе Турпал волча Боканаькъан Мустафай цӏи бӏаьшерашка яхаргья къаман исторе. 58-ча юкъарча бӏун эскара 42-ча гвардейски полка 71-ча мотоиччархой батальона хьалха латташ, тӏема декхараш токхаш вар деналах визза хинна вай мехкахо. Шийна тӏехьалаттарий уйла еш, цхьаккха а моттиге шийгара гӏалат ца гойташ чакхваьлар из. Ишттача къаман виӏий цӏи боча хила еза вай дегашта!
