ГИТИСе деша отта безам бараш къоастабеш, болх дӀабихьар Наьсаре
Театральни кхолламах йолча Россе институте (ГИТИС) деша отта ловш бараш къоастабеш, болх дӀахьош хилар Наьсаре. Из хоам «Сердалога» бир цу моттигера.
Европе эггара йоккхагӀа лоархӀаш йолча вузе деша отта безам бола къонабараш хьалххе хьабаьхкабар. Монологаш, кӀоанолгаш, байташ ешаш, иллеш оалаш, халхабоалаш шоай говзал, начӀал дӀахьокхаш бар уж кхелахошка. Эггара хьалха сцена тӀа арабаьлар Калмыкера кхаьча Эрендженова Абыль, Манджиева Занда. Царна тӀехьа шоай начӀал гойта эттар 17 шу даьнна Лимарева Алима, 20 шу даьнна вай мехкахо Зангенаькъан Накир. Горин Григорех язъяьча «Герострат вицвар» яхача пьеса тӀара дакъа, Есенин Сергея «Кхалсагага яздаь каьхат» дийшар вай мехкахочо.
Алимас йийшар Соколова Аллай «Александра» яха монолог, Пушкин Александра «Воаш цадезараш беза вайна» яха байт. Шоашта деннача хаттарашта жоп дала дезаш бар деша оттараш. Кхелахой - ГИТИСа ашарех йолча факультета декан Сополёв Тимофей, ИФЛИ кафедра кулгалхо вола Ястребов Андрей, продюсерски факультета декан Симурзина Елена, режиссёрски факультета декан Посельский Сергей, иштта модератор волаш вар царна юкъе ГИТИСа ректора гӀонча, Россе къулбихьерча театрий Ассоциацена хьалхалатта Базорканаькъан Микаил.
«Бера хана денз, довзаш ва театраца дувзаденнараш. Эггара хьалха ишколашкарча кхетаченашка дакъа лоацаш дӀаволавелар, тӀаккха айса цхьацца проекташ вӀашагӀъехкар. Сценаца двзаденна йоазош деш къахьегаш ва со тахан. Сай начӀала боарам бовза, ма дарра аьлча, сайна фу хов тахка, гучадаккха венав со тахан укхаза дукхагӀа. Фу хургда хац, бакъда дӀахо къахьегаш гаьнавала лаьрхӀа ва со», - дийцар Зангенаькъан Накира.
Кхетаче вӀашагӀъеллараша белгалдечох, шин дийнахьа экзаменаш дӀалуш хургба вай республикера, Астраханера, ГӀаьбартой-Балкхарой мехкара, Черсий мехкара, Селашкахьара, ГӀалмакхий, Нохчий мехкашкара, ХӀирашкахьара ГИТИСе деша отта безам бараш.
