Къоаной Кхела кхетачен юкъе дакъа лоацаш хилар МВД болхлой
Къоаной Кхела кхетачен юкъе дакъа лоацаш хилар МВД болхлой. Из хоам «Сердалога» бир цу моттигера.
«Наьсарерча администраце дӏайихьача боккхагӏбарий оагӏон кхетаче дакъа лоацаш бар мехкарча чурча гӏулакхех йолча министерствон кулгалхочун гӏонча, полице полковник Маммаев Багомед, полице полковник, моттигерча МВД Госавтоинспекце оагӏон кулгалхочун декхараш кхоачашдеш вола Зурабанаькъан Султан, СКФО Россе МВД ГУ Юкъарча оагӏон доакъашхо Гаданаькъан Муса, республикерча МВД ветераний оагӏон хьалха латта Котанаькъан Мухьмад-Сали», - дийцар тха газетага.
Таханарча дийнахьа эггара лоархӏамегӏа дола хаттараш доашхаш хилар кхетаче. Маммаев Багомеда белгалдир, МВД балха отта безам барашта гӏо дергда, аьнна; иштта хьалхадаьккхар, интернета оагӏонашка гӏолла тийшаболх боаржаберех лоралуш хила безилга; нагахьа шоай цӏагӏа уллаш герз дале, из ӏаьдалга дӏачулуш хила, аьнна.
Зурабанаькъан Султана дийцар тахан вай наькъашка латтача хьалах, хатараш ма хулла лаьгӏде гӏерташ ГИБДД болхлоша лоаттабеча балхах. Наькъашкара бокъонаш лораеш боацараш тахан вайна юкъе болаш ба, даггара къахьегаш латте а. Гаданаькъан Мусас, Котанаькъан Мухьмад-Сале боккхийбараш тӏахьийхар; машинашца, гӏаш леларашта наькъашкара бокъонаш лораяр чӏоагӏа лоархӏаме долга хьалхадоаккхаш хила, аьнна.
Белгалде деза, иштта йола кхетаченаш дӏакхахьар, карарча хана эггара лоархӏамегӏа хинна латтараш тохкаш, доашхаш болх лоаттабар чӏоагӏа эшаш долга, цох боккха пайда хьабоалилга.
