Токах тӏалатта декхар хьагулде арабаьлар Магӏалбике
Магӏалбикерча администраце болхлошца токах тӏалатта декхар хьагулде арабаьлар цу оагӏонцара болхлой. Рейд дӏахьош хиннараша бахархошта хьалхадаьккхар хьаӏайна ахча ханнахьа дӏателар лоархӏаме долга.
«Декхар тӏалаттарашца дийцар, ахча массехк бетта дийкъа дӏадала йиш йолга. Иштта дӏатела йиш хилча, дезала аттагӏа хул, бакъда оттаяь чӏоагӏа йохае йиш яц, нагахьа йохайой ток дӏахоадаергья», - дийцар «Сердалога» Магӏалбика кхален администраце.
Шахьара даь гӏонча волча Кӏориганаькъан М. белгалдир; декхар дӏатела раьза боацарашта духьала болх лоаттабергба, аьнна. Ток дӏахоадаярал совгӏа, суда искаш, доалахьара хӏама ӏаьдала кара дӏачудахийтар, мехкара аравала йиш йоацаш бокъо ехкар, ахча тӏадеттадалар хургда цу юкъе.
Бахархошка кхайкарал ду тока оагӏон болхлоша, боккъал а декхарашка гаьнадувлаш шоаш халача хьале ца увттадеш, ханнахьа дӏатела тӏалатта ахча, яхаш.
