Балхазал лохъяр - Гӏалгӏайчен ӏаьдала теркамера гӏулакх
2025 шера Гӏалгӏайчен къахьегама базар тӏа дукха къахьийгад наха болх хургбола оагӏув лохаш Из хоам «Сердало» газетага бу республикан кулгалхочун зарбан болх лелабераша.
«Керттера декхар – наха бе болх цахилара хьал лаьгӏдар, вай бахархошта новкъостал дар, болх лахар, иштта нах балха оттабара керда таронаш лахар. 2026 шера юххьанца болх лоаттабара йолча моттиге дӏаязваь вар 17 эзар саг, царех 15 эзар болх боацаш вар. Уж, дӏадахача шера хинначул, ши эзар кӏезигагӏа хилар. Цу тайпара, тха таро хилар балхазал 5,6 % дӏаяккха, (2024 шера из дар 6,1%). Из дика толам ба, бакъда кхы а бе безаш дукха болх ба», - аьлар ГӏР кулгалхочо Келаматанаькъан Махьмуд-Ӏаьлас.
Карарча шера, из болх дӏахо дӏахьош ба. Цу тайпара, балха оттавара йолча моттиге новкъостал дезаш вена хилар 7900 саг, царех 1210 сага болх корабир.
Наьха тайп-тайпара болх лаха таронаш хургйолаш, ӏаьдало царна йоагӏаш йола кхетаченаш дӏахьу. Царех эггара чӏоагӏагӏа накъайоалаш я балха оттавара йола Ерригроссийски ярмарка, цига дакъа лоацаш ба Гӏалгӏайчера, РФ кхыча 16 моттигера болх лоаттабераш. Укхаза яр 15 эзар болхлой эша моттигаш.
Цунца цхьана йоккха терко лоаттаю наха эшаш йола балха говзалаш ӏомаяра. Масала РАНХиГС, Томскера университет бувзам лелабеш я Гӏалгӏайчен керда хӏама ӏомадара, тахан дӏабехаш бола болх бе ховш хургбола нах кийчбеш.
«Цул совгӏа, 2025 шера дӏахо дӏахьош ба СВО доакъашхой хьаллацара болх. Цар дезалий реестре 2400 дезал ба, царех 190 - бейнарий дезал. Тхона бицлуц ветеранаш: карарча шера Афганистана 46 ветерана субсидеш делар; хӏаьта 18 заӏапхо, бераш-заӏапхой долча дезалашта вахара хьалаш тоаде новкъостал дир», - аьлар Макшарипа Махьмуд-Ӏаьлас.
Цо яхачох, кхы а дукха болх бе беза, къахьегама рынок тоаяра.
Керттердар - из гӏулакх кхоачашде гӏерташ республика къахьегаш я, из дика кхоачаш а дергда.
