Кагирхой лорабеш бола болх чӏоагӏбе безилгах дийцар вай Мехкадас
Воча гӏулакхех, зуламех вай кагирхой лорабарах дийцар мехкадас Келаматанаькъан Махьмуд-Ӏаьлас, мехкарча Халкъа Гуллама кхетаче.
«Таханарча хана геттара чӏоагӏа лоравала везаш ба хоамашка гӏолла боаржабеш бола тийшаболх, зулам. Цхьа кӏеззига ахча луш, интернета оагӏонашка гӏолла бакъдоаца, бух боаца хӏамаш доаржадеш, къонабараш цхьацца воча гӏулакхашта тӏахьехаш, уж кегабе гӏерташ, болх лоаттабу зуламхоша», - белгалдир Мехкадас.
Цо теркалдечох, из деррига кхетадеш, ишколашка, вузашка, иштта цӏагӏа дезала юкъе воча, ийрчача хӏамах уж лорабара тӏехьа хьехам лоаттабе беза цахаддаш. Кхетам балара гӏулакх паччахьалкхен дӏатӏадилла вагӏар нийса дац, массане цхьана дӏабахьа безаш болх ба из.
Хӏама хьаэцаш, сага кхетам нийсбеш йола эггара керттера моттиг - дезал ба, цунга хьежжа хӏара цӏагӏа терко лоаттае еза къонабараш нийсача наькъ тӏа бахара, харцача хӏаман юстара хилийтара.
Тахан вай мехкарча кулгалхоша дӏахьош латтар боккха болх ба; къонабараш дийша, цхьацца говзал ӏомаяь, къахьегаш хилийта гӏерташ; цар начӏал доаржадеш, оагӏув хьаллоацаш. Массахана терко лоаттае езарех да хоамашца доаржадеш дола зулам, цу хӏаман никъ хоадабеш, къахьегаш да ӏаьдал.
