«ДикагӀбарий цӀи яккха дагахьа яхьебаьлар 18 шерга кхаччалца ха яьннараш. Къовсам дӀахьош бар «Магас» яхача Наьсарерча Йовлой Берда цӀерагӀча спорта цӀен латара шин кӀувса тӀа. Котало яккха къовсабелар Селий мехкара, ГӀабартой-Балкхарой Республикера, ГӀирмера, Къилбаседа ХӀирийчен- Алане Республикера, Краснодарски краера, Нохчий а ГӀалгӀай мехкашкара латархой», - аьлар хоамо.

Турнира хьаьший бар ГӀалгӀай Республикан Паччахьалкхен, спорта чуйоагӀача министерствон викалаш, иштта РФ тайп-тайпарча моттигашкара Олимпийски ловзарий, дуненна, Европанна, мехка цӀихеза чемпионаш. Цига дукха бар ший лоӀамеча латара «седкъа» ала йиш йола нах. Хоамо йоах, ГӀалгӀайчен ондаргий тоабо укхаза 6 дошо,7 дото,9 боарза мейдилгаш яьхар.

Из дика хьокхам ба, дукха а тӀатеӀӀа а къона латархой Ӏомабеш тренировкаш дӀайихьа хиларах баьккха. Мехкашта юкъерча яхье котбаьлар Кхоартой Заурбек (42 кг), Вердиев Джабраил (45кг), СапарӀаланаькъан ИсмаӀал (48кг), Шаухаланаькъан Халит (51 кг), ХумидовгӀар Ахьмад (55 кг), Осменаькъан Адам (60 кг), Ӏахилганаькъан Ахьмад (65 кг), ЭльдаровгӀар Мухьмад (71 кг), Хоаной ИсмаӀал (80 кг), Тогоев Артур (92 кг), Туаев Тамерлан (110 кг). Котбаьннарашта ахчан совгӀаташ делар ГӀалгӀай Республикан Паччахьалкхен Председатела хьалхарча заместитела Йовлой Мухьмада, Республикан Парламента депутата Келаматанаькъан Гилане.

Иштта ГӀалгӀай Республикан спорта министра декхараш кхоачашдеш вола, ГӀалгӀай Республикан спортивни латара Федераце президента Белхарой Руслана котбаьннарий тренерашта ахчан совгӀаташ делар. Цул совгӀа, шозза Олимпийски чемпиона СадулаевгӀар Ӏаддал-Ррашида а тӀехьара тӀа котбаьннарашта совгӀаташ делар. 80 кг дозал дарашта юкъе котваьнначоа ахчан совгӀат делар Дагестана Республикан спортивни латара Федераце вице-президента Магомедов Махьмуда.

ГӀалгӀайчен латархошта хьалхашка керда декхараш, лакхаленаш латт. Шоай говзал лакхъеш, уж кийча ба спорта даькъ тӀа эггара йоккхагӀча коталонашка кхача.