АслахановгӀар Асланбека дезалца сагото екъаш ба вай республике
Россе вахаре цӀихеза политически, паччахьалкхен болхло, нохчий къаман юкъе йоккха моттиг лелаеш хинна АслахановгӀар Асланбек кхелхача, Йоккхача АтагӀа баха хилар вай мехкарча паччахьалкхен оагӀон болхлой. Дуккхача моттигашка ший цӀи дӀахазийта вола воӀ веннача нахаца, цар сагото екъаш ба вай мехкахой.
«СССР МВД милице инарал-майор, юридически Ӏилмай доктор, профессор волаш ваьха АслахановгӀар Асланбек, уж балхаш леладарал совгӀа, Россе политически, паччахьалкхен болхло санна вовзаш вар. Къилбаседа Кавказера кхоачамбоацараш юстардахара тӀехьа дӀахьоча балха, Россе Президента гӀонча волаш къахьийгар цо диъ шера. Паччахьалкхен Думан депутат, Федераце Совета доакъашхо хилар из.
Ше лелача моттигашка лакха лоархӀаш хиннача АслахановгӀар Асланбека дуккхаза гӀо дир вай республикан, политически оагӀонцара лоархӀаме гӀулакхаш чакхдоахаш. Нохчий къаманна, ерригача Къилбаседа Кавказа боккха эшам ба иштта вола саг дӀавалар. Нохчий къаман хьалхалаттача КадыровгӀар Рамзанаца, цун гаргарча нахаца царга кхаьча гӀайгӀа екъаш ва со.
Дала гешт долда цунна! Дала къахетам болба цох!» - аьлар вай мехкадас Келаматанаькъан Махьмуд-Ӏаьлас. 2024-ча шера ахкан тӀехьарча бетта 11-ча дийнахьа, 83 шу даьнна волаш, вахар хаьдар цу яхь йолча сага. Могаш воацаш дукха ха яьккхар цо.
