ГӏалгӀай мехка ялх шера 24 культуран цӏа хьал а даьд, тоа а даьд
Республике «Культура» яхача къаман проекта чуйоагӀаш, ялх шера кхоачашъяьй «Культуран» кхо программа: «Культуран хьал», «Коллама нах», «Таьрахьий культура». ГӏалгӀайчен культура дегӀайоалаярга дӀадахар юкъарча инвестициях 863 млн сом.
ГӏалгӀай Республикан Кулгалхочун, Паччахьалкхен зарбан болх лелабераша яхачох, керда хьалъяьча объекташта юкъе да цхьайтта культуран цӀа: Пхьилекъонгий-Юрта, Чамалха, Берда-Юрта, иштта кхыча юрташка. ЦӀенхаштта тоаяьй Алхастера, Гӏажарий-Юртара, Эккажкъонгий-Юртара, Долакоара, иштта кхыча юрташкара моттигаш. Тоаяьрех я ГӏалгӀай паччахьалкхен ТЮЗ, берий искусствай ишкол, исбахьален искусствай Паччахьалкхен музей, Магасера театран, кино, таханарча заман тароний Центр.
Белгалдаккха лов, керда культуран моттигаш коллективашта кхоллама балхаш дӀадахьара накъайоал.
Нах чухошаш йола залаш 5150-нега кхоачаш яр 2018-ча шера, уж 2024 шерга кхоачаш 8 733 моттигага кхоачаш хилар.
«Таьрахьий культура» яха проект кхоачашъеш хилар лоархӀаме да. Цо таро лу паччахьалкхен филармоне даькъ тӀа юкъе йоккха юкъ йоллаш луча концерта зал хьакхолла.
Кхы кӀезигагӀа лоархӀаме хиланзар «Кхоллама нах» яха программа, из хилар бахьан долаш, «Культура волонтераш» яха программа тӀакхийтар, хӀаьта 586 саг Ӏомалуш хилар говзал лакхъеча центре.
Цул совгӀа, хьакхеллар Наьсарен - Шахьаре, Мужеча, Заьзганаькъан-Юрта модульни библиотекаш. Иштта Ӏаьдало эшача гӀирсашца Ӏалашйир культуран урхалленаш, царна ийцар 40 музыкальни инструмент, оргтехника.
«Вайна гуш да республикан культуре хувцамаш хулаш долга: искусство езараш совбоалаш боагӀа, берий начӀал гучадоалаш да, кагирхошта терко лоаттаю.
Культура дегӀайоалаяр - из хургдар хьакхоллар да вай хозлуш боагӀача ГӏалгӀай мехка. Цига вайна новкъостал ду «Культура» яхача проекто, из могаяьй Россе Президента», - аьлар ГӏалгӀайчен кулгалхочо Келаматанаькъан Махьмуд-Ӏаьлас, къаман проект ялх шера кхоачашъеш хиларах дувцаш.
