«Тха спецназ» яха сериал йоаккхаш хилар вай мехка
ГӀалгӀай мехка «Тха спецназ» яха сериал йоаккхаш хиннача «Триикс Медиа» яхача кинош доахача оагӀон тоабаца кхетаче дӀайихьар культуран гӀулакхех йолча вай мехкарча министерствон кулгалхочо Лаьнанаькъан Залинас. Вай мехкара болх йистебаьлар цар. Кхетаче дийцар, дӀахойодача хана вӀаший бувзам лелабарах, вай мехка цар чакхбаьккхача балхах.
«ГӀалгӀай мехкарча тамашийна долча Ӏаламах, хозача, бӀарг тӀаоттача моттигех шоашта хийттар дийцар актёраша Шкуратов Виктора, Горобченко Сергейс, Папанин Андрейс, Жизневский Матвейс, Василевский Никитас. Доккха баркал аьлар цар шоай проект хьаллоацаш гӀо даьча Лаьнанаькъан Залинайна. Министерствон кулгалхочо болх бу кинематографи вай мехка йоаржае гӀерташ, кинош доахаш йола тоабаш, продюсераш гӀалгӀай мехка кинош дахара тӀахьехаш», - дийцар «Сердало» газетага министерствон викалаша. ГӀалгӀай мехка кино доаккхаш къахьегаш хиннача актёрашта баркал аьлар Лаьнанаькъан Залинас, цу тайпара проекташ вай мехка йоаржаяра тӀахьийхар уж.
Кино доаккхаш баьхкараша, чӀоагӀа раьза болаш, дийцар бахархой шоашта гӀо деш хиларах, беррига болх тӀехдика чакхбаларах. ВӀаший бувзам лелабеш, цхьана керда проекташ вӀашагӀйохкарах дийцар кхетаче.
