ГӀалгӀай мехка кхаьчар начӀал дола боксёр Фаьрганаькъан Хьамзат
21.05.2024 15:54
ГӀалгӀай мехка юхавера 13-14 шу даьннарашта юкъе боксах дӀахьош хиннача Россе Хьалхалене котваьнна Фаьрганаькъан Хьамзат, яхаш, дийцар «Сердало» газетага ГӀалгӀай Республикан спорта Министерствон зарбан болх лелабераша.
«Магас» аэропорте, цун тренерца Булгучанаькъан Мухьмадаца, кӀаьнка духьалвахар ГӀалгӀайчен спорта министра гӀонча Султиганаькъан ТӀахӀир, республикан гулъяьча тоабан керттера тренер Дарсиганаькъан Або, иштта гаргара нах. Дукха сатийса кхетаче гӀадбахарца дӀайихьар спорта викалаша, ловцаш доахаш», - йоах хоамо.
Белгалду, къона чемпион салоӀаш хургва укх деношка, хьатӀайоагӀача Европа хьалхале яккхара яхьашка дика кийчо е дагахьа, низ чуболийташ.
