Дийца керттера дош дар Донецкера, Луганскера, Запорожски, Херсонски областашкара беха нах тIаэцарца, уж фусамашка дIанийсбарца дувзаденна.

Хоам бу, чоалхане хьал оттарах, уж шоай фусамашкара беха хьабехка хиларах. Таханарча денна царех цхьайтта саг «Асса» яхача гостинице Iеш ва. ДНР, ЛНР республикера ши саг ва вайцига Iеш. Уж шоай гаргара нах болча сайцаб.

ГIалгIайчен кулгалхочо белгалдаьккхар уж нах бахача моттигашца а буача кхачанца а Iалашбе беза, аьнна. Геттара сиха де дезача гIулакхех да эшаш долча каьхаташца уж Iалашбар, социальни даькъе меттаоттабеш дола гIо дар, берашта психологически оагIорахьа дика лар ютаргйола вошал дар.

«Вай республико эшаш дола новкъостал дергда фусамех бехача наха, царна шоай цIагIа болаш санна паргIата хургйолаш, эшаш мел долча хIаманца Iалашбеш», — аьлар ГIалгIай республикан кулгалхочо Келаматанаькъан Махьмуд-Iаьлас.

Херсонера а Херсонски областера а нах керда вахар долаш Iоховшаргба, РФ министрий кабинета соцамах, царна сертификаташ лургда, шоашта эшар эцара цкъара луш дола ахча а лургда. Уж дIанийсбара а эшача кхачана а лаьрхIа, ахча хIанззе хьожадаьд.