Ишколаш кийча йий тохкаш, болх дӀабихьар Илдарха-ГӀалий тӀа
Кердача шерга ишколаш мел кийча я хьожаш, болам боаржабир шахьаре. «ЦаӀ йолча Россе» хьаллоацаш, парте Къаман программага гӀолла дӀахьош бола болам дешара шу доладеш берашта мел эшар Ӏалашдара тӀехьа вӀашагӀбелла ба.
«Из болх дӀахьоча тоабанна хьалхаэттар вар шахьара кхела кулгалдеш вола Хамхой Ӏалихан. Комиссена юкъе бар депутаташ-единороссаш Амаканаькъан Хьусен, Султиганаькъан Ӏарби, Овшанаькъан Ваха. Ишколашкара хьал миштад хьожаш, кхерамзлен оагӀонца дувзаденнарашта лаьрхӀа терко йир цар. Хьехархошца, кулгалхошца къамаьл хилар. Дешара шу дӀадоладе уж мел кийча ба, деррига кхоачам болаш дий техкар цар. Шоаш гӀо де кийча болга дӀахайтар цар ишколерча тоабанна», - дийцар «Сердалога» шахьара администраце.
Илдарха-ГӀалий тӀарча ишколай хьал тохкаш дӀабихьача балхах, уж ерригаш дешара шерга кийча я ала йиш я майрра. Белгалде деза, деррига балхаш мехкарча кулгалхоша лакха тӀахьожам лоаттабеш чакхдаьхалга.
