Оакхарашта туха кхерий дехкаш, болх бу вай хьунашка
12.02.2024 10:54
Шолжа кхален хьунашка лелача оакхарашта, тух дехкаш болх бу хьуна тӀахьожам лоаттабеча къахьегамхоша. Из хоам «Сердало» газетага бир Ӏалама гӀулакхах йолча министерствос.
«Ер кхоалагӀа йола моттиг я, оаха оакхарашта мотт хьекха тух кхерий дехкаш. Цо дегӀа низ чӀоагӀбу оакхарой, царна эшаш йола микроэлементаш йоахк цох. Хан-ханнахьа дӀакхахьа безаш болх ба ер.
Хьунашкарча оакхарий уйла еш, уж кӀалдусаргдоацар леладеш, хила деза вай», - аьлар Ӏалама гӀулакхех йолча министерствон хьун тӀахьожам лоаттабеча оагӀонна кулгал деча Евкуранаькъан Аслана.
Белгалде деза, каст-кастта ялат тувсаш, тух дехкаш бола болх Ӏан хана дӀакхахьар лоархӀаме долга. Вай хьун кхоачам лорабу цу гӀулакхо.
