«Дезалца салаӀар» яха 10-гӀа республикан кхетаче дӀайихьар Магасе
«Дезалца салаӀар» яхача проекта автор йолча Галай Хьавас республикерча пхьарий Ассоциаце тоабанца моттигера 10-гӀа кхетаче дӀайихьар. Из хоам «Сердалога» бир цу моттигера.
«Кагирхой цхьанкхетарий цӀагӀа гулбелар бераш санна боккхийбараш а. Царна юкъе дар хала таро йолча дезалашкара бераш, тӀема операце доакъашхой, гаргара нах, иштта кхыбараш.
Топпара хӀамаш хьаярах, каллиграфех, сурташ дехкарах дола балхаш дар цига. Иштта дӀайихьар викторина, истола тӀара ловзараш, «Ткъамаш», «Валтар», «БӀаьсти» яха лоаца кинош хьекхар кхетаче», - дийцар тха газетага.
«Таханарча берий сакхетам, уйлаш телефонаша дӀалаьцача хана, чӀоагӀа лоархӀаме да дунен тӀа дуккха а пайдане, дика хӀамаш долга дӀагойтар. Къахьегаш хиларо, уйла нийса вӀашагӀйолларо гаьнавоаккх саг, дукха керда наькъаш хьаделла низ лу», - дийцар Галай Хьавас.
Белгалде деза, из болх «Роскагирхой. Гранташ» яхача программо хьаллоацаш, дӀахьош болга.
