«Дека» яхача артистий тоабан концерт хилар Магасе
Даьхен Турпалий Ден хетадаь концерт дӏадихьар Магасе «Дека» яхача тоабан артисташа. Республикан дукха бахархой гулбенна кхетаче хилар цох. «Сердалога» из хоам бир «Хьалхарчар болам» яхача оагӏон доакъашхо волча Налганаькъан Рамзана. «Лакха начӏал долча артисташа, гулбеннарий дог айдеш, къахьийгар цига.
«Турпалий оазаш» яхача проекте котало яьккха Хьалхарбарий тоаба яр цига, иштта цу оагӏонцара Берий симфонически оркестр, кхыбола артисташ а. Россе къамаш цхьана хиларах, Даьхенцарча безамах, лерхӏамах дола мугӏараш дар цар дешашца хозаш. Ший тоаба тӏехьа йолаш араяьннача Цхьорой Луизас боккха тоам бир массане дегашта», - йоах тхога бенача хоамо.
«Цу концерте белгалдир, Россе мехка дахаш дола къамаш массахана шоайла барт болаш, вӏаший тӏаотташ хила дезилга; Даьхен хӏама лорадар, из езаш вахар хӏаране декхар долга; тӏехьено тӏехьенга телаш цу оагӏонцара дикаш доаржаде дезилга», - аьлар Налганаькъан Рамзана.
