ЙIаьхъенна керда ишкол хьйийллай Магасе
704 моттиг йола керда ишкол хьаеллаш, мехкада Келаматанаькъан Махьмуд-Iаьла юкъе волаш, кхетаче дIайихьар Магасе. Шахьара моттигаш тоаярах йолча къаман проектага гIолла 2018-ча шера дIаболабаь болх бар из, бакъда мехка Паччахьалкхено гIо деш хIанз мара йистебаьннабац.
Шахьарера кхыйола ишколаш паргIатйоахаш да из беркате гIулакх. 2021-ча шера йистебала безаш хинна из болх, гIишлон балхашта хьалхалаьттараш тешаме нах цахиларах укх ханналца гаьнабаьлар.
Таханарча хано дIадеххача тайпара тоаяьча ишколе кхетачеш дIакхухьа зал, библиотека, аьшках, дахчах хIамаш хьаеш йола пхьоалле, кхача кийчбе, хIамаш тега Iомавеш йола моттигаш я. Иштта 174 сага лаьрхIа даа хIама кийчду моттиг, лорий, царгий лорий кабинеташ, спорта зал, кхыдараш а да кердача ишколе. ДегIа могашал эшаеннача берашта лаьрхIа лифт, пандусаш я цига.
«Айвалара тIадам» яха дешара моттиг я ишколе хьайийлла. Кхы а пхиъ ишкол я укх шера болх бе йолаяла езаш. Мехка Президента тIадиллар кхоачашде аьттув болаш хул вай тIаккха - 2030-ча шера шин сменах дешаш дола гIулакх дIадаьккха хила дезаш да», - белгалдир вай Мехкадас.
