Магасе хилар пхьоал леладеча наха хетабаь фотогойтам
«Культуран код: овлангара искусствон такилг» яхача РФ СТД Паччахьалкхен стипенде проекта чуйоагIаш, Магас шахьаре кхетаче хилар. Пхьиленаькъан Заура дIабихьар «ГIалгIайчен боккхагIа болча говзанчий пхьоалле» яха суртий гойтам», - аьлар «Сердало» газетага цу моттиге.
ЦIихезача суртанчаша дIахьош болча пхелагIча гойтаме гулбелар юкъарлон викалаш, кагирхой, журналисташ. Кхетаче иштта баьхкабар Пхьиленаькъан Заура кхоллам безараш.
Хьаьший таэцаш, автора баркал аьлар шийна новкъостал мел даьрашта.
ГIалгIай Республикан Паччахьалкхен исбахьален искусствон музея кулгалхочо ТIумхой Любас, иштта начIал долча суртанчас Цхьорой Аюпа, ГIалгIай Республикан СТД кулгалхочо Ховтанаькъан Дугурхана ловца баьккхар Заура, кердача кхоллама толамашца.
Концерта программа хьайийллар театра, кинон таханарча заман хьалий Центра иллиалархо йолча Эккажанаькъан Розас ший иллеца. Iарпенаькъан Хьавас чIондарг лекхар. Къонача ашархочо Хьоашаланаькъан Лолитас хьамсарча мехках дола илли аьлар. Боканаькъан Ахьмада пандар лекхар.
«Уж сурташ дийна дагалоаттам ба; оамал, иштта ший гIулакх дезаш хилар гойташ. ХIара сурт – вай тIахьехаш санна да говзанчаша, цар искусство вай къаман культуран дIоагIа да», - аьлар Пхьиленаькъан Заура.
Белгалду, из гойтам хетабаь бар, РФ театра болхлой Союза 150 шу дизара. Цига гойтача балхех моллагIбар эца йиш йолаш бар.
