Магасерча Гаьгенаькъан урам тӏа тоаеш латтача моттигашка тӏахьожаш хилар кхелахой
Гаьгенаькъан цӏерах болча Магасерча урама хьалага хьажа арабаьлар тахан шахьара да вола Тиймарзанаькъан Муса, горсовета хьалха латта Дарсиганаькъан Хаваж-Бахьаудин. Къаьстта терко йир хьакимаша тӏема операце доакъашхой сийна хьайийллача аллейна.
«Хӏара моттигера болх боаггӏача боараме дӏахьош бий теркалдеш, хилар шахьарера хьакимаш. Балхага хьажарал совгӏа, малагӏча кхоачамца деррига тоадеш да теркалдир цар. Белгалдир, деррига балхаш тӏехьа ца бусаш, юххьанца къоастаяьча ханага кхоачаш дӏахьош долга», - дийцар «Сердалога» Магасерча администраце зарбан болх лелабераша.
Тиймарзанаькъан Мусас белгалдир, бахархошта паргӏата йолаш, уж раьза хургболча тайпара кхоачашде дезилга деррига. Шахьара дас аьлар, къаьстта из моттиг ерригача республикан лоархӏаме йолга, цунга хьежжа болх цхьаккха кхоачамбоацар доацаш, гӏалат доацаш дӏабахьа безилга. Деррига хӏама лакхача боараме долаш, йиллача хана чакхбаьккха хила беза болх.
