Дербичанаькъан Хизара хетаяь яхьаш дӏайихьар Магасе
Ший новкъост кӏалхарвоаккхаш, хиво ӏовихьача Дербичанаькъан Хизара хетаяь яхьаш дӏайихьар Магасе. Цигарча рузбан маьждига хьужаре дешаш долча бераша хьагойтар шоай футболацара, жӏакех ловзарцара, ӏадсаькх кхоссарцара, муш дӏа-хьа увзабарцара, турникацара, геракашцара, хьастамий чутохарцара, кулгаш гӏортадарцара, иштта кхыдолча оагӏонашцара говзал.
Чӏоагӏа дог айденна дар бераш, ше-ше котвала гӏерташ. Котбаьннараш Пхьарчанаькъан М. цӏерах йолча стадиона тӏа белгалбир тайп-тайпарча совгӏаташца. Цу юкъе дар 5000 сома сертификат, сахьат, ламаза кӏувсаш, проектораш, бус йоагаю лампаш.
«Цу яхьаша хьагойтар дегӏаца денал хилар, моллагӏа хӏама нийсденнача гӏо де хьажар мел лоархӏаме да. Дербичанаькъан Хизар вай мехка санна ерригача Кавказе а вицлургвац. Ший яьннача ханага хьежжа доацаш, доккха денал гойта саг ва из», - дийцар тха газетага культурах, спортах, туризмах йолча Магасерча моттига кулгал деча Къоастой Мухьмад-Башира.
