МагӀалбикерча «Фаьлг» яхача кердача берий бешо кастта ший наӀараш хьаелларгья
220 бера моттигаш луш йолча МагӀалбикерча «Фаьлг» яхача берий бешо кастта, ший хьалхара зӀамига хьаьший тӀаэцаш, наӀараш хьаелларгья. «Демографи» яхача къаман проектага гӀолла, дӀахьош беркате болх ба из. Коа лостам беш, чухьнахьа эшаш мел йола хӀамаш Ӏоувттаеш, боахк цига карарча хана. Из хоам «Сердалога» бир шахьара администраце.
«ДӀадахача шера Ӏан хьалхарча бетта, дӀаболабир из болх ООО «Кадастр-ЮФО» яхача гӀишлон балхаш деча моттиго. Керда берий беш хьаелларо паргӀатонга йоахаргья, гонахьара кхыйола берий бешамаш. Шахьарерча бахархошта доккха совгӀат хиннад геттара зӀамига дола бераш а чудолхаш йола керда берий беш хьаелларах», - дийцар тха газетага.
Таханарча хано дӀадеххача тайпара, дуккха кердадараш юкъедоаладеш, хьалъяьй берий беш. Чура, тӀера тоаеш даь балхаш; бӀарг тӀаоттаргболча тайпара кхоачашде хьежаб къахьегамхой.
