Кхача бохкача, наха хӏама дуача моттигий хьал миштад техкар Магӏалбике
12.08.2026 09:25
Магӏалбикерча экономически гӏулакхех болча оагӏон болхлоша; шоашца Роспотребнадзор, Россельхознадзор йолаш; шахьарерча дулх дохкача, хӏама дуача моттигий хьал техкар. Кхача лорабар, дулха хьал миштад, моттигашка цӏена йий, иштта цу чу болх бечарга «медицински книжкаш», кхыдола каьхаташ дий хьожаш хилар уж.
«Дӏабихьача тохкамо цхьацца йолча моттигашкара кхоачамбоацараш гучадаьхар. Цу моттигашта доал дечар цӏерах акташ оттайир, нийсденна гӏалаташ юстардаха, аьнна, ха къоастайир», - дийцар «Сердалога» Магӏалбика кхален администраце. Кхача ийбечар бокъонаш лораеш бола тӏахьожама болх цу моттигашка каст-каста дӏакхухьаш ба. Наха буаш бола кхача унахцӏенонна зе деш боацаш, цӏена хилийтара тӏехьа дӏакхухьаш я уж рейдаш.
