МагӀалбика ишкола карт тоае лерхI
ГӏалгӀайчен ЦУРо мехка дешара, Ӏилман Министерстве дӀадахьийтар МагӀалбик-Шахьара №6 йолча ишкола гонахьара карт воча хьале хиларах дола наьха лоткъамаш. Бахархоша хоам бу, цхьайолча моттиге карт йоацаш я, цхьайолча геттара лохига я. Цо хьал кхераме дерзаду дешархой, иштта бехктокхаме болча наха из теркал ца делга а гуш да.
«Министерствон болхлоша сиха цу моттигера хьал техкар. Цу тайпара гуш хилар 450 метр йола ишкола гонахьара карт пайдана йоацилга, из таханарча дено дӀадехарашка хьежжа йоацилга.
2022 шера ишкол цIенхаштта тоаеча хана, из карт цунна чуйоагӀаш хиннаяц. Из болх кхоачашбара министерствос ишкола кулгалхошкара хьадийхар цунга дIагIоргдолчун каьхаташ. Хьакхаьчачул тӀехьагӀа уж юкъегӏоргда шоай аргӀагIа», - аьлар «Сердало» газетага ГӏалгӀайчен дешара Министерстве.
Министерстве белгалдир, берий кхерамзле хьалхарча аргӀагIа латташ йолга, уж кхоачамбоацараш юстардахара де йиш мел яр хьадергдолга.
