Мужеча «Кавказа Рок: ГӏалгӀайче рока мукъаме» яха концерт хургда
26.06.2025 10:14
Шоатта дийнахьа Мужечарча спортивни дешар дӀахьоча зале рок-концерт хургда,«Кавказа Рок: ГӏалгӀайче рока мукъаме» яхаш. Из хоам бу «Сердало» газетага Хамхой А. цӀерагӀча Паччахьалкхен филармоне зарбан болх лелабераша.
«Кагирхой Ди дездеш, 17 сахьат даьлча сцена тӀа яргья «Тешам боаца нах» яха Каспийскера тоаба. Цу тоабанна керте латт вокалист Пилецкий Арсений, фата еттар Махдимагомедов Мухьаммад, гитара локхараш Ибрагимов Гусейн, Алиев Ахьмад, иштта Кошкарев Евгений, из ва бас-гитара локхаш. Хьажа баьхкарашта гургда дицлургдоаца цӀай, хоза кхетаче, хозаргья ашараш», - аьлар хоамо.
Белгалду, концерта программа хозъеш хургба «Дега оаз» яхача тоаба викалаш, из я Хамхой А. цӀерагӀча Паччахьалкхен филармоне даькъ тӀа.
