Халкъа Гулламе дийцар, гӀалгӀай меттаца, литературанца дувзаденна дешаш
Парламента кулгалхочо ТӀумхой Мухьмада кулгал а деш, яьржа кхетаче дӀайихьар Халкъа Гуллама комитеташа, из хетаяь яр дешарца дувзаденнача хаттарашта.
Керттера теркам тӀабахийтар дешара юкъе гӀалгӀай меттала книжкаш, уж дӀахьехача наькъадаргдола йоазош арахецара. ТӀумхой Мухьмада белгалдир из дош лоархӀаме хилар, из Парламенте цкъа дийца Ӏийнадоацилга.
ГӀалгӀай Республикан дешара, Ӏилман министра гӀончас Угарчанаькъан ПаьтӀамата, ший оагӀонца баьча балхах къамаьл дир, ГӀалгӀай Республикан ИПК РО ларда тӀа гӀалгӀай метта, литературан дешара–гӀон болх вӀашагӀболларгбола болхлой къахьегаш хилар белгалдаьккхар цо.
Укх наькъа йистебаьннаб гӀалгӀай меттала 1-4 классашта дола книжкаш арахецара хьалхара аргӀагӀа беш хинна болх, хӀаьта 3-4 классашта методически кулгал арахецара гӀалгӀай меттала болх дӀахохьош ба.
Белгалде лов, 5-11-ча классашта книжкаш юкъедахара болх йисте баргба 2026-ча шера бекарга бетта.
«Из декхар кхоачашдара йилла ха тӀехьаяккха йиш йолаш яц. Беррига низ тӀабахийта беза из дош кхоачашдара», - аьлар ГӀалгӀай республикан Халкъа Гуллама кулгалхочо.
