200 бера лаьрхӀа берий беш хьалъеш латт Наьсаре
19.02.2024 11:21
200 бер чуэцаш йола керда, хоза берий беш хургья Наьсаре. Из хоам «Сердало» газетага бир гӀишлой балхах йолча министерствос. «ДӀадахача шера ахкан хана, дӀаболабир из болх. 3083,8 кв.м йола шозза вӀаштӀараяь гӀишло урагӀъяхар шахьаре, йоккха юкъ ялалехь. Таханарча дийнахьа, 45% кхоачаш йистебаьннаб цигара болх.
ООО «Гранд-Строй-Лидер» яха гӀишлой балхаш деш йола моттиг я из болх шийна дӀатӀаийцар. ГӀишлой балхах йола министерство я балха тӀахьожам лоаттабер. Пенашта юкъе йовкъаш ехка, кӀалхара кӀийле тоаеш, лагӀаш хила деза моттигаш чӀоагӀъеш, боахк болхлой.
Коара котельни, ток хьалу моттиг хьаяь яьннай. Кастта кораш дӀаувттаде, тӀера пенаш кирпишкаца дӀакъовла болалургба уж. Керда берий беш доккха совгӀат да шахьара бахархошта.
