Наьсаре хьайийллар хьалхара Эрсий географически юкъарлон моттиг
Наьсарерча №20 йолча Джамболатанаькъан З. Р. цӏерагӏча ишколе хьайийллар, Гӏалгӏайчера хьалхара Эрсий географически юкъарлон моттиг. Цо дика юкъедоалду дешара хьалхале лелаю балхаш, хӏаьта РГО доакъоша хьаелл кхувш йоагӏача тӏехьен хьалхашка ӏилма, мохк тохкача, туризма даькъ тӏара керда таронаш.
«Кхетаче дӏахьош дийцар хьамсара мохк тахкар, ӏалам, культуран тӏехьале лораяр, кхувш йоагӏача тӏехьенна кхетам балар лоархӏаме хиларах. Моттигерча даькъа кулгал де хержар Мерашканаькъан Тамила - хьехархо, юкъарлон болхло.
Ше къамаьл деш, цо белгалдир; кердача моттига болх дешархой хьашташ лоархӏаш хургба, аьнна. Республике хьалхара РГО оагӏув хьабеллар лоархӏаме да ӏилма тохкача, туристаша мохк тохкача лостамагӏа, иштта экологически болх дӏабахьара. Цо тӏахьехаргба хьамсарча республикан тамашийна тӏехьале ӏомаяра», - аьлар «Сердало» газетага Гӏалгӏайчен дешара, ӏилман Министерстве.
Эрсий географически юкъарлон керда моттиг тӏахьехаш я дешара, экспедице, тохкама болх дегӏабоалабе дег чура безам бараш.
