Балхаца ювзаеннача моттигашка каьхаташ дӀачулуш, аргӀа лаьца, хьежа везаргвац
ГӀалгӀайчен минимуществе, аргӀах этта, хьежа безаш хургбац нах, шоай доалахьара боахам хьатӀаязбе каьхаташ дӀучулуча, из нийслора цу боахама болх нийса вӀашагӀбелла цахиларах. Из аьлар Махьмуд-Ӏаьлас Наьсарен-Шахьара бахархошца, моттигерча Ӏаьдалца кхетаче дӀахьош, яхаш, хоам бу «Сердало» газетага мехка кулгалхочун зарбан болх лелабераша.
«Цхьаькха хаттар а дийцар, из кхетаче дӀахьош. Шахьара вахархо раьза воацаш вар, карарча хана лаьтташ къоастадарца дувзаденна дешаш ГӀалгӀайчен минимуществонна дӀачуденна хилара. Цо яхачох, цу урхаллено, доалахьара боахам хьатӀаязбара каьхаташ кӀира шин дийнахьа мара дӀачуэцац, цудухьа каьхаташ ханахьа кхоачашдаь далац», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас, ше цу лоархӀамеча кхетачен чаккхе еш.
Цо белгалдир, моттигерча министерствога из болх дӀабалар бахьан да, лаьтташ, бокъо а йоацаш, хьалувцаш хилара харцо ханнахьа юхатохар.
Цу юкъе Махьмуд-Ӏаьлас белгалдир, наха лерттӀа хьалаш хьакхолла деза, ха йоаеш лела безаргбоацаш болх вӀашагӀбелла хила беза, хӀара дийнахьа нах тӀаэцаш йола график а йолаш.
