Хиш лийлха моттигаш тоаеш латт юрташка
18.12.2023 10:19
Тишъенна хин турбаш хувцаш бола болх дIакхухьаш латт республикерча юрташка. Укх наькъа, Алхастерча Трудовой, Лесной оалача урамашкара хин турбаш лийлха хатар юстардоаккхаш баьхкар цу даькъ тIара болхлой. Из хоам «Сердало» газетага бир Шолжа кхалерча администраце.
«Сов чехка оарцагIбаьннача болхлоша тоайир хий лийлха моттигаш. 150 метр йола керттера турба хийцар цига», - йоах тхогарча хоамо. ДаьттагIерча ГIаппархой цIерах болча ураме а дIабихьар цу тайпара болх.
Белгалде деза, иштта дола хатараш кхыйолча юрташка нийслуш долга. Дукха ха йоацаш, боккха болх дIахьош баьхкар цу даькъ тIара болхлой ТIой-Юртарча, Долакха-Юртарча хин турбашца.
