Заьзгакъонгий-Юртарча ишколе Даькъастен къамий фестиваль дӏайихьар
Россе къамий меттай Денна хетаяь йола Даькъастен къамий фестиваль дӏахьош бар Заьзгакъонгий-Юртарча № 26 йолча ишколе. 1-ча, 4-ча классашкара дешархой бар дакъа лоацаш хиннараш. Даькъасте дахача къамий ӏадаташ, оамалаш, культура, истори дайзар берашта цу дийнахьа.
«Чӏоагӏа дог айденна дар бераш цу фестивале. Байташка, халхарга, театральни номерашка гӏолла республике дахача къамий культура йовзийташ бар уж, иштта хӏара къаман даарех долча ӏадатех дийцар.
Хоза, товш кийчденнадар бераш. Россе къамий истореца, культураца, ӏадаташца вай берий лерхӏам хургболаш дӏахьош болх бар из. Цига гулбеннабар цхьацца хьакимаш, депутаташ, дешара, культуран моттигашкара болхлой. Цу юкъе вар Магӏалбика кхалерча парте оагӏон секретарь, кхален депутатий Совета кулгалхо Гӏулой Къурейш, «Цаӏ йолча Россе» моттигерча кхела хьалха латта Медаранаькъан Аьсет, Магӏалбикерча райсовета депутат ӏаьленаькъан Дауд, мехкарча Халкъа Гуллама депутат хила ловш вола таханара кандидат Чуранаькъан Мустафа; Наьсарерча, Магасерча дешара оагӏонцарча моттига кулгалду Ӏумаранаькъан Аза, суртанча-сценограф Цисканаькъан Тамара, Заьзгакъонгий-Юртарча культуран Цӏен кулгалхо Чаненаькъан Тамара, «Бералла наькъаш» яхача проекта доакъашхо Кхоартой Таисия», - йоах «Сердалога» «Цаӏ йолча Россе» ИРО баьча хоамо.
Къамий ӏадаташ довзийтар массанена дег чу дужаш хӏама долга хьагойтар цу фестивало. Даькъасте тхьовра денз дахаш долча къамий бӏаьшерашкара хьадахьа гӏулакхаш довзар берий дог айдеш хилар. Бӏарчча цӏай хилар фестивалах. Ший овла, хьаваьнна моттиг, истори, культура, мотт лакхача боараме довзар лоархӏаме долга белгалдеш болх хилар цох.
