Мехкарча Къоаной кхеле, наьна мотт лорабарах дийцар
Гӏалгӏай метта хӏама лорадарах, из боаржабара тӏехьа кхоачашде дезача керттердарех дийцар, Къоаной кхела вӏашагӏкхетаре. Цига дакъа лоацаш бар дешара оагӏонцарча моттигий викалаш, юкъарлон болхлой. Дувца оттадаьча керттердарашта юкъе, лоархӏаме моттиг дӏалоацаш дар наьна мотт къонабарашта юкъе боаржабар; из цӏена, шаьра, боаггӏача боараме бувцаргболаш, кхувш латтача тӏехьено цун сий дергдолаш къахьегар.
Кхетачен доакъашхоша белгалдир, наьна мотт лархӏар эггара хьалха цӏагӏара хьадоагӏаш долга; даьй, ноаной ба шоай дезала масал дӏахьокха дезараш, къаман мотт мара ца бувцаш.
«Из болх дӏахьош латташ ба мехка. Хьалхарча классашта лаьрхӏа книжкаш да кийчдеш, иштта хьехархошта лаьрхӏа а кердадараш да. Наьна метта хӏама тоаде аьнна, «Яндекс. Таржамхо» яхача оагӏонца 95 эзар совгӏа предложени кийчъяь корпус я тахан. Цул совгӏа, гӏалгӏай меттала кинош, мультфильмаш доахаш къахьегаш ба республике», - дийцар «Сердалога» мехкарча паччахьалкхено.
Боккха ӏоткъам беш да тахан коммерчески оагӏонцара реклама еча баннераш тӏа, улгаш тӏа, цхьацца моттигаш белгалъеча, наьна меттала яздаьр гӏалаташ юкъе долаш хилар. Из чакхдалийта йиш йолаш хӏама дац, республике йоазув тӏадолаш цхьа хӏама хьалтоха воаллар; шийна ца хойя ховчарца дагавоалаш; нийсагӏа мишта хила деза тохкаш, хила веза.
