Къамий цхьоагӏон Ди дездир вай республике
Къамий цхьоагӏон Денна хетаяь йоккха кхетаче дӏайихьар Магасерча Алане доазон тӏа. Из хоам «Сердалога» цу моттигера бир.
Дукха адам дар из цӏай дезде гулденнар, гуш дар берригаш дог айденна болга.
Бахархой даькъалбувцаш даьча къамаьла юкъе вай мехкадас Келаматанаькъан Махьмуд-ӏаьлас белгалдир; моттигера, федеральни оагӏонцара хьакимаш бахархой хьал тоаде гӏерташ къахьегаш болга. Тахан тайп-тайпарча къамий эзараш къонгаш латт, Даьхен моттиг лораеш. Мехка кулгалхочо теркалдир, вай цхьана, вӏаший оагӏув хьаллоацаш мел долча хана, вай низа чӏоагӏа хургдолга.
«Тахан вай къестадац метташ, къамаш! Хӏаране кхетаду, бӏаьшерашка денз хьадахьаш дола къаман ӏадаташ, оамалаш сага дӏайоахаргйоацилга. Вай массахана хьалха латта дезаш да; дикача, беркатеча хӏаман тӏехьа къахьегаш дӏадаха дезаш да; яхь, сий лорадеш. Республике, берригача мехка хӏама тоадеш къахьегар да вай декхар. Цудухьа белгалду аз, укх беттара 4-гӏа ди берригаш цхьана хилара цӏай долга! Вӏаший барт, безам лорабеш, сийрда кхоане кхоллаш, хоза хӏама теркалдеш, хьаллоацаш, воча гӏулакхий никъ тедаш даха деза вай дерригаш, тӏаккха хургда вай вахар паргӏата, беркате», - аьлар Мехкадас бахархошка.
Иллеш, халхараш дар цига. Шоай начӏал гойташ «Росси» яха илли дӏааьлар «Дека илли» яхача кхалнаьха тоабо, «Россе гӏулакха латт со» яхар дӏааьлар кадетски корпусе дешаш бараша, иштта сцена тӏа шоаш дӏахьокхаш бар филармонера артисташ, тайп-тайпарча ишколашкара дешархой.
Мехкарча пхьарий тоабо, Галай Адама кулгал деш, гойтам дӏабихьар цига. Шоай кулгашца йоккха говзал йолча мехкахоша хьаяь дукха хӏамаш яр гойташ хиннараш: сурташ, куцала лоаттаю хӏамаш, берий ловзоргаш, иштта кхыдараш а. Дукхача говзанчаша шоаша болх мишта дӏахьу хьахьекхар цига гулбеннарашка.
