«Хьалхарчар болама» Медиакхетаче дIайихьар Магасе
«Хьалхарчар болам» яхача оагIонна хетаяь Медиакхетаче дIайихьар Магасе. Кагирхой цхьанкхетарий цIагIа дIайихьача кхетаче хьайийллача проектай яхьашка дакъа лоацаш яр тайп-тайпарча моттигашкара 8 тоаба. Из хоам «Сердалога» бир цу оагIон болхло волча Налганаькъан Рамзана. «Цхьацца кхоачамбоацараш тоадара тIехьа лоархIаме йола проекташ гойтар кагирхоша. ЦIихезача нахаца дIахьоча кхетаче дакъа лаца, царгара цхьацца пайданедараш Iомаде, хьаэца ловш вар 60 совгIа дешархо.
Кхетачен хьаьший болаш, къамаьл деш хилар блогер Барханой Джабраил, Къаман берий театра кулгалхо Цхьорой ИбрахIим, юкъарлен оагIон доакъашхо Далганаькъан Чаборз, «Фу? Мичахьа? Маца?» яхача телеловзаре котваьнна Гаьгенаькъан Хьусен, байтанча Пхьугой Мадина, бизнесмен Бисайнаькъан Лом-Iаьла, каскадер вола ГIайтакханаькъан Ислам», - дийцар тха газетага.
«МедиаГаргало» яхача ерригача Россе проекте котало яьккхар «Ча текхадаь никъ» яхача тоабо, шоллагIча моттиге эттар «ДIоагIа» яхача тоабан доакъашхой, хIаьта кхоалагIа моттиг «Хоамий цIокъболат» яхача тоабанга кхаьчар.
